Lang Jahren hett uns Hambörger Oostfresenvereen de Graffstee van uns Prinzessin Juliane Louise van Oostfreesland plegt, bit 2010 de „Förderkreis Ohlsdorfer Friedhof e.V.“ disse Plicht overnohmen hett. 

Man wo kummt dat, dat uns oostfreeske Prinzessin up de Karkhoff Ohlsdörp in Hambörg begraven liggt? 
Hier is de Historje van uns Prinzessin:

Prinzessin Juliane Louise, boren 1657, was de ollste Dochter van Fürst Enno Ludwig, de 1660 bi ´n Jagdunfall to Dood komen is. In sien Testament hett he de Herzog Rudolph August von Braunschweig de Vörmundskupp overdragen. Man dat gaff nahst Striederee um dat Arvgood. 1686 is de Prinzessin na Plön trucken un hett van daar wall Kuntakten na Hambörg knütt. En Advokaat daar hett hör denn hulpen, 59000 Daler ut dat Arve to lösen un se kun sük an de Jungfernstieg en Huus kopen. In Hambörg dürrs domals keen Minsk van Adel en Grundstück kopen. Darum stunn dat Huus up en anner Naam (Gertrud Luis, geb. Sillem), dat se bit 1715 bewahnt hett.

To de Tied hett se de Pator Joachim Morgenweck kennenlehrt un sük mit hum tosamen daan. Man na en leep Krankheid (Pest?) is se 1715 doodgahn. In hör Testament hett se vermaakt, dat se tegen Betahlen van 1000 Dalers in en Gruft in de St. Maria Magdalenen- Kark hör lesd Rüststee finnen schull. Man in Auerk harren´s dat Testament neet in Reken und dat Geld neet utbetahlt. So is de Dodenkist 16 Maanten in dat Stadthuus stahnbleven. Erst 1717 is de Sarg denn in de Gruft komen mit de Klausel, dat dat Grafft noit weer open maakt werden dürst: „solang de Wind weiht un de Hahn kreiht“. 

Man de moje olle Kark wurr bold ofreten, de Gruften kwammen na de Karkhoff bi ´t Dammtor un later, as ok daar de Karkhoff upgeven wurr, na Ohlsdörp. 
Nu is mit Beitel in de Graffsteen inslaan en Slang, de sük in de Steert bitt un de Worden: 
„Ruhestätte, die nie zu eröffnen ist“